Abn logo
Apr 24 2020 @ 00:20AM

కల్లోల కాలంలో కొన్ని సానుకూల కోణాలు

కరోనా ప్రజల్లో వ్యక్తిగత పరిశుభ్రతపై అవగాహన పెంపొందించింది. ప్రజలకు పరిసరాల పరిశుభ్రత ఆవశ్యకతను విశదీకరించింది. కాలుష్యరహితంగా ఉండేందుకు కరోనా దోహదపడింది. శ్రమ పట్ల ప్రజల్లో గౌరవాన్ని పెంపొందింప జేసింది. ఇది స్వీయ క్రమశిక్షణకు దారితీయటంతో పాటు జీవితం పట్ల కొత్త అర్థాన్ని ఆవిష్కరింపజేసింది. సామాజిక సంబంధాల్లో కుటుంబంలో బంధాలకు ప్రాధాన్యతని పెంచింది. అన్నింటినీ మించి జీవితానికి నిజమైన అర్థాన్ని, పరమార్థాన్నీ బోధించింది.


భారతదేశం ఎన్ని విపత్కర పరిస్థితులైనా తట్టుకుని నిలబడగలిగే శక్తిని, ప్రత్యేక లక్షణాలను కలిగి వుంది. గతంలో సంభవించిన అనేకానేక విపత్తులను, మహమ్మారులను తక్కువ ప్రాణనష్టంతో ఎదుర్కొని వాటి నుంచి బయటపడగలనని నిరూపించింది. ఇప్పటి కరోనాను కూడా పారదోలగలదనే చెప్పాలి. ఇప్పటికే కేంద్రం, తెలంగాణ లాంటి రాష్ట్రాలు అమలు పరుస్తున్న చర్యలు ప్రజల్లో భరోసా కలిగిస్తున్నాయి.


మనదేశంలో చాలాకాలంగా ప్రజారోగ్య వ్యవస్థ కొన్ని లోపాలు వున్నప్పటికీ అందరికీ అందుబాటులో ఉంది. వైద్యరంగం ఇంతగా అభివృద్ధి చెందకమందుకూడా రకరకాల వైద్య విధానాల మూలంగా మన దేశంలో చౌకగానే వైద్యం లభ్యమయ్యేదని చెప్పవచ్చు. దరిమిలా ప్రభుత్వం ప్రవేశపెట్టిన పథకాల వల్ల అందరికీ వైద్యం అందుబాటులోకి వచ్చింది. ఇప్పుడు వైద్య, ఆరోగ్య రంగాల్లో లభిస్తున్న నూతన సాంకేతికత, అధునాతన చికిత్స విధానాలు మొదలవ్వడానికి పూర్వమే దేశమంతటా గ్రామీణ ప్రాంతాల్లో ఆర్ఎంపీలు, పీఎంపీలు, ఎల్ఎంపీలు, పట్టణాల్లో జనరల్ మెడిసిన్ నేర్చిన ఎంబీబీఎస్ డాక్టర్లు ప్రజలకు సేవలందించే వారు.


కాలక్రమేణా నగరాలు, పట్టణాలు, మెట్రోపాలిటన్ సిటీల్లో కార్పొరేట్ ఆసుపత్రులు విస్తరించాయి. గ్రామీణ ప్రాంతాలలో కూడా అవి కొద్ది కొద్దిగా విస్తరిస్తున్నాయి. ప్రభుత్వాలు కూడా ఆరోగ్య పథకాలు ప్రవేశపెట్టి సామాన్యులకు వైద్యసేవలను అందుబాటులోకి తెచ్చాయి. ఆరోగ్యశ్రీ పథకమే దీనికి ఉదాహరణ. ఇవి బ్రిటన్ జాతీయ ఆరోగ్య పథకం మాదిరి, అమెరికా ఒబమా కేర్ లాగా బీమా కంపెనీల ప్రభావంతో నడిచే పథకాలు కావు. భారతదేశంలో ఆరోగ్య పథకాలు వారి-వారి ఆర్థిక స్తోమతకు అనుగుణంగా వున్నాయి.


వైద్య- ఆరోగ్య సంరక్షణను ఏ దేశంలో నైనా మూడు అంచెలుగా విభజించాల్సి ఉంటుంది. సర్వ సాధారణంగా (మామూలు జ్వరం లాంటివి) అవసరమయ్యే వైద్య చికిత్సలన్నీ ప్రాథమిక విభాగంలోకి (ప్రైమరీ కేర్) వస్తాయి. ప్రత్యేకమైన ఆరోగ్య సమస్యలు, దీర్ఘకాలిక సమస్యలు ద్వితీయ విభాగంలోకి (సెకండరీ కేర్) రాగా, తృతీయ విభాగంలోకి (టెర్షరీ కేర్) సూపర్ స్పెషాలిటీ, మల్టీ స్పెషాలిటీ సమస్యలు వస్తాయి.


ప్రభుత్వం పెద్ద సంఖ్యలో ప్రాథమిక ఆరోగ్య కేంద్రాలు (పి.హెచ్. సి.లు), కమ్యూనిటీ హెల్త్ సెంటర్లు (సి.హెచ్.సి.లు) నెలకొల్పి ప్రాథమిక ఆరోగ్య సమస్యలకు ఉచిత వైద్య సేవలు అందిస్తున్నది. ఇక రెండో రకమైన వైద్య సేవలు అందించడానికి జిల్లా స్థాయిలో ఏరియా ఆసుపత్రులున్నాయి. ప్రైవేటు ఆసుపత్రులు చాలావరకు, ప్రభుత్వ ఆసుపత్రులు కొంత మేరకు సూపర్ స్పెషాలిటీ, మల్టీ స్పెషాలిటీ సేవలు అందిస్తున్నాయి.


మన చిన్నతనంలో, మన ఇళ్లలోని అమ్మమ్మలు, నానమ్మలు, జలుబు, దగ్గు, విరేచనాలు, అజీర్తి, చిన్నపాటి జ్వరాలు, గాయాలు, తదితర సర్వసాధారణ రుగ్మతలకు పోపు డబ్బాల్లోని సామాన్లతోనే చిట్కా వైద్యం చేసేవారు. సామాన్య సమస్యలకు ఇదొక పరిష్కారంగా వుండేది. అలాగే మనం తినే వివిధ ఆహార పదార్థాలలో రోగ నిరోధక శక్తినిచ్చేవి అనేకం వుండేవి. తరతరాలుగా మన ఊర్లోని నాటు వైద్యులు, ఆర్ఎంపీలు, ఇతర ప్రయివేట్ ప్రాక్టీస్ చేసే ఆయుర్వేద, మూలికా, హోమియో వైద్యులు రోగిని బట్టి, రోగాలను బట్టి మందులు ఇచ్చేవారు. ఆ వైద్యులకు మన కుటుంబాలతో ఉన్న అనుబంధం, కుటుంబీకుల ఆరోగ్య లక్షణాలన్నీ తెలియడం వల్లే సత్వరం రోగం నయమయ్యేలా వైద్యం అందించే వారు. హస్తవాసి అని కూడా అనేవారు. ఇప్పుడు అవన్నీ పోయాయి.


స్వాతంత్ర్యానంతరం ప్రభుత్వాలు ప్రజారోగ్యానికి ఎక్కువ ప్రాధాన్యతనిస్తున్నాయి. 1948 నుండి కలరా, మలేరియా మహమ్మారులను నివారించడానికి బి.సి.జి. లాంటి టీకాలను తప్పనిసరి చేశారు. ఇవి మనకు కొత్త వైరస్‌లను తట్టుకొనేలా, రోగ నిరోధక శక్తిని కూడా టీకాలు పెంపొందించాయి. దేశంలో మలేరియాతో పాటు, మశూచి, కోరింత దగ్గు, కుష్టు, పోలియో వంటి భయంకర వ్యాధులను నియంత్రించడానికి, రూపుమాపడానికి ఈ టీకాలు ఎంతగానో దోహదపడ్డాయి. అందుకే ఇపుడు మనం కరోనా మహమ్మారి నుంచి బయటపడటానికి కూడా ఇవే దోహదపడే అవకాశం ఉంది. ఈ విషయాన్ని ప్రపంచ ఆరోగ్య సంస్థతో పాటు పలువురు నిపుణులు కూడా చెప్తున్నారు.


కరోనాకు మందు పరిస్థితిని చూస్తే ప్రజారోగ్య సౌకర్యాలు అందుబాటులో ఉన్నందున గ్రామీణ ప్రాంతాలలోని ప్రాథమిక ఆరోగ్య కేంద్రాలు (పి.హెచ్.సి.లు) మొదలుకొని పుట్టగొడుగుల్లా వెలసిన కార్పొరేటు ఆసుపత్రుల వరకు ఎక్కడ చూసినా రోగులు కిటకిటలాడుతూ ఉండేవారు. చిన్నాచితకా రోగాల నుండి ప్రత్యేక సమస్యల కోసం వైద్యం కోసం వచ్చే రోగులతో హాస్పిటళ్లలో ఓపీలు, డయాగ్నస్టిక్ సెంటర్లు కూడా ఎప్పుడూ రద్దీగానే ఉండేవి. 


తెలంగాణ ప్రత్యేక రాష్ట్రంగా ఏర్పాటయ్యాక వైద్య, ఆరోగ్య రం గాల్లో హైదరాబాద్ నగరం ప్రపంచానికి ఫార్మా హబ్‌గా మారింది. ఇతర రాష్ట్రాలతో పాటు, విదేశాల నుంచి కూడా రోగులు హైదరాబాద్‌లోని కార్పొరేట్ హాస్పిటళ్లకు వైద్యం కోసం వస్తుండటమే కారణం. ఏ రాష్ట్రంలోనూ ఇలాంటి పరిస్థితి లేదు. అయితే, ఈ కరోనాతో ఒక్కసారిగా పరిస్థితి తారుమారయింది. ఇపుడు కరోనా బాధితుల కేసులు తప్ప వేరే ఆరోగ్య సమస్య ఊసేలేదు. కార్పొరేట్ ఆసుపత్రులు రోగులు లేక వెలవెలబోతున్నాయి. పి.హెచ్.సి.లు, ప్రైవేటు దవాఖానలు, చిన్నాపెద్దా ఆసుపత్రులన్నీ అలాగే ఉన్నాయి. కరోనా తప్ప మరే జబ్బు లేని పరిస్థితి ఏర్పడింది. హై బీపీ,లో బీపీ, షుగర్ వ్యాధులు, దీర్ఘకాలిక వ్యాధుల గురించి రావడమే మానేశారు. చిన్నాచితకా ఆరోగ్య సమస్యల గురించి ప్రజలు పూర్తిగా మరిచేపోయారు.


ఒక ప్రముఖ పల్మనాలజిస్ట్ (ఛాతీ, అలర్జీ వ్యాధుల నిపుణుడు) ఈ విషయమై వివరిస్తూ ఏ ప్రైవేటు లేదా కార్పొరేట్ ఆసుపత్రికైనా 4 రకాలుగా ఆదాయం వస్తుందన్నారు. 25 శాతం ఆదాయం విదేశీ రోగుల (మెడికల్ టూరిజం) నుండి, 10 శాతం ఆదాయం ఔట్ పేషెంట్‌ల (ఓపి) నుండి, 40 శాతం ఆదాయం శస్త్ర చికిత్సల నుండి, 25 శాతం అత్యవసర కేసుల్లో ఆపరేషన్ల నుంచి సమకూరుతుందన్నారు. ఇప్పుడు ఇవన్నీ ఆగిపోయాయి. కరోనా కారణంగా ఆస్పత్రుల్లో ఆపరేషన్లు పూర్తిగా ఆపివేశారు. ఇతర దేశాల నుండి రోగులు వచ్చి వైద్యం చేయించుకోవటం లేనేలేదు. ఇక రోజూవారీగా వచ్చే రోగులు లాక్‌డౌన్, రవాణా సౌకర్యాలు లేనందున స్థానిక వైద్యుల సలహాలతో మందులు వాడుతూ ఆస్పత్రులకే రావడం లేదు. దీంతో ఆస్పత్రులన్నీ వెలవెలబోతున్నాయి.


కరోనా ప్రజల్లో వ్యక్తిగత పరిశుభ్రతపై అవగాహన పెంపొందించింది. ప్రజలకు పరిసరాల పరిశుభ్రత ఆవశ్యకతను విశదీకరించింది. కాలుష్యరహితంగా ఉండేందుకు కరోనా దోహదపడింది. శ్రమ పట్ల ప్రజల్లో గౌరవాన్ని పెంపొందింప జేసింది. ఇది స్వీయ క్రమశిక్షణకు దారితీయటంతో పాటు జీవితం పట్ల కొత్త అర్థాన్ని ఆవిష్కరింపజేసింది. సామాజిక సంబంధాల్లో కుటుంబంలో బంధాలకు ప్రాధాన్యతని పెంచింది. అన్నింటినీ మించి జీవితానికి నిజమైన అర్థాన్ని, పరమార్థాన్నీ బోధించింది. ఇవన్నీ సానుకూల కోణాలే. కాలుష్య పరిమాణం తగ్గింది. మామూలు రోజుల్లో ఇది సాధ్యమయ్యే పనికాదు. ప్రకృతి తన పూర్వస్థితికి వస్తున్నది. వాహనాల రాకపోకలు లేకపోవటంలో ప్రమాదాలు పూర్తిగా తగ్గిపోయాయి.


ప్రభుత్వం ఇప్పటికే రాష్ట్రంలోని ప్రైవేటు మెడికల్ కళాశాలల్లో బోధనాసుపత్రులను కరోనా నియంత్రణకు వాడుకుంటున్నది. అలాగే, రాష్ట్రంలోని ప్రైవేట్ కార్పొరేట్ ఆసుపత్రులు కూడా ఖాళీగానే ఉన్నందున ఆ ఆస్పత్రుల్లోని మంచాలు అవసరమైతే కరోనా వ్యాధిగ్రస్తుల ప్రివెంటివ్, క్యూరేటివ్, ఐసోలేషన్ సేవల కోసం ఉపయోగించుకుంటే మంచిదేమో!

వనం జ్వాలా నరసింహారావు

Advertisement
Advertisement
Advertisement