Abn logo
Feb 22 2021 @ 00:15AM

పాసంగం

పొద్దు ఉరక ఎద్దు ఉరక

ఎద్దు ఎంట ఎన్ను ఉరక

ఎన్ను ఎంట మడి కన్నీటి తడి

పచ్చి పడమటి గూడు జేరింది


గలుమ తాకింది లేదు

గడియ పురుసతు లేదు

కండ్లు గాలిస్తున్నయి

చేతులు చెరుగుతున్నయి

కుత కుత లేని కుండ

కూడునే కలగంటుంది

కార్తి కలసి రాలే

ఏలినోడు ఏరు పురుగయ్యిండు


శెరలు లేని సిరులు

సిరులు లేని శెరలు

ఏమి సిత్రమో

ఎవరు రాసుకున్న పత్రమో

గట్టు కీదిన కుక్క 

గుదేల్లి సచ్చినట్టయ్యింది

ఏమి సేత సేద లేని సేత

పాణం ముక్కుల మీదికొస్తుంది

నిమిషం నిమ్మలం లేదు

మడికట్ల మీది నించే

మఠాలెంట పడిపోతే బాగుండు


ఎడ్డి సెలక ఎల్లెలుకల పడితె

సాలు మీది కొచ్చేసరికి

సాలు సాలు అయ్యింది

మెడ మీని గుండ్లు

మెడ మీది నించే బాయె

సెవుల గంటీలకు

గంట కొట్టి

కాళ్ళ కడీయాలు కరిగి పాయె

కన్నీళ్లే మెరిసే నగలు

కడుపు తరుముకు పోతుంటే

కడుపు మీదే కొడుతున్రు

కాలం కాకపోతే

కాలం జేసుడేనాయే

కనికరం లేక పాయె


మట్టి మరక తప్ప ఏ మరక ఉంది

ఎద మీద పొట్టకొచ్చిన పైరు

పడుకొని ఉంది

కండ్లు తొట్టల్లయ్యినయి

కలల మీన వలలేసి

కల్లాన్ని అల్లకల్లోలంజేస్తున్రు

మనిండంగనే మట్టి నించి

మనిషిని మైల బాపుతున్రు


నడి తోవనా......

తల్లెలు నాదానుతో తల్లడిల్లితున్నయి

గాంధి లేడు గ్రామస్వరాజ్యం లేదు

నోట్ల మీద తప్ప

ఎవరి నోట్లో ఉన్నవు మాహాత్మా

బలగం లేదు బంధువులులేరు

పచ్చులకు ఉచ్చులేసే ఉన్నయి

ఊర్ల ఉసురు కొట్టుకొని

నగరం నడి తోవ నరకమయ్యింది

నాట్లేస్తే నల్లమబ్బులన్నా కరుగుతయేమో కాని

ఓట్లేస్తే గీ పాశనపు గుండెలు కరుగలే


రైౖతు భూమిని కౌలుకు తీసుకున్నట్టు

మార్కెటు పార్లమెంటును 

కౌలుకు తీసుకుందేమో

కన్నీళ్ళని కూడ కాంట కొడుతున్నరు

జెండా పాసంగంతోనే ఎగురుతుంది

మునాసు వెంకట్‌ 

99481 58163

Advertisement
Advertisement
Advertisement